గువాహటిలోని డిస్పూర్ పోలీస్ స్టేషన్ సమీపంలో పార్క్ చేసి ఉన్న ఎర్ర రంగు స్విఫ్ట్ కారులో బుబ్బు అనే పెంపుడు కుక్క ఉదయం నుంచే ఒంటరిగా చిక్కుకుపోయింది. కారు తలుపులు లాక్ అయి ఉండటంతో బయటకు రావడానికి దానికి ఎలాంటి అవకాశం లేకపోయింది. మధ్యాహ్నం 1.30 గంటల వరకు కుక్క అదే కారులో ఉండిపోయిందని స్థానికులు తెలిపారు.

ఎండ తీవ్రత పెరగడంతో కారు లోపల ఉష్ణోగ్రతలు ప్రమాదకర స్థాయికి చేరుకున్నాయి. దాహంతో, వేడితో అల్లాడుతున్న బుబ్బు శ్వాస తీసుకోవడానికి కూడా తీవ్రంగా ఇబ్బంది పడుతున్నట్లు అక్కడి ప్రజలు గమనించారు. కుక్క పరిస్థితిని చూసి చలించిపోయిన స్థానికులు దానికి సహాయం చేయడానికి ప్రయత్నించారు. చిన్న సీసా ద్వారా కారులోకి నీరు అందించేందుకు ప్రయత్నించినప్పటికీ, అది సరిపోలేదు. సమయం గడుస్తున్న కొద్దీ బుబ్బు పరిస్థితి మరింత విషమంగా మారింది.

దాదాపు ఆరు గంటల పాటు కుక్క కారులోనే బంధించబడి ఉండటంతో స్థానికులు అత్యవసర నిర్ణయం తీసుకున్నారు. కుక్క ప్రాణాలు ప్రమాదంలో ఉన్నాయని భావించి కారు అద్దాన్ని పగులగొట్టి బుబ్బును బయటకు తీసుకొచ్చారు. బయటకు వచ్చిన సమయంలో అది తీవ్ర అలసట, నీరసం కారణంగా నిలబడలేని స్థితిలో ఉన్నట్లు ప్రత్యక్ష సాక్షులు తెలిపారు.

సమాచారం అందుకున్న జంతు సంక్షేమ సంస్థ ప్రతినిధులు వెంటనే అక్కడికి చేరుకుని బుబ్బును తమ సంరక్షణలోకి తీసుకున్నారు. నీరు అందించి, ప్రాథమిక చికిత్స చేసి, వైద్య పరీక్షలు నిర్వహించారు. సకాలంలో రక్షించడంతో బుబ్బు ప్రాణాపాయం నుంచి బయటపడింది.

న్యూస్18 ప్రతినిథితో ఈ ఘటనపై కుక్క యజమాని మొజిబుర్ రహ్మాన్ మాట్లాడుతూ.. గణేశ్‌గురి ప్రాంతంలో జరిగిన ఓ గొడవ కేసులో పోలీసులు తనను అదుపులోకి తీసుకున్నారని చెప్పారు. ఆ సమయంలో బుబ్బును కారులో వదిలి వెళ్లాల్సి వచ్చిందని వివరించారు. గత ఆరు నెలలుగా తమ కుటుంబం బుబ్బును ఎంతో ప్రేమగా చూసుకుంటోందని తెలిపారు. ఈ ఘటనపై విచారం వ్యక్తం చేసిన ఆయన, భవిష్యత్తులో ఇలాంటి పొరపాటు మళ్లీ జరగకుండా జాగ్రత్తలు తీసుకుంటానని క్షమాపణలు చెప్పారు.

ప్రస్తుతం బుబ్బు క్షేమంగా ఉందని, వైద్యుల పర్యవేక్షణలో కోలుకుంటోందని జంతు సంక్షేమ సంస్థ వెల్లడించింది. ఈ ఘటన జంతువులను ఎప్పుడూ మూసివేసిన వాహనాల్లో ఒంటరిగా వదిలేయకూడదనే విషయాన్ని మరోసారి గుర్తు చేసింది. ముఖ్యంగా వేసవిలో కారు లోపల ఉష్ణోగ్రతలు చాలా వేగంగా పెరిగి జంతువుల ప్రాణాలకు ముప్పుగా మారే అవకాశం ఉందని నిపుణులు హెచ్చరిస్తున్నారు.