ఈ చిత్రంలో డోరేమాన్, నోబితా, అతని స్నేహితులు సముద్ర గర్భంలో జరిగే అద్భుతమైన సాహస యాత్రలో పాల్గొంటారు. స్నేహం, ధైర్యం, కొత్త విషయాల అన్వేషణ ప్రధాన అంశాలుగా రూపొందిన ఈ సినిమా చిన్నారులకు వినోదంతో పాటు మంచి సందేశాన్ని అందించనుంది.

ప్రపంచవ్యాప్తంగా కోట్లాది మంది అభిమానులను సంపాదించుకున్న డోరేమాన్ సృష్టికర్త ఫుజికో ఎఫ్ ఫుజియో రాసిన మంగాపై ఈ చిత్రం ఆధారపడింది. ఆయన సృష్టించిన పాత్రలు తరతరాల ప్రేక్షకులను ఆకట్టుకుంటూ వస్తున్నాయి.

భారతదేశంలో ఈ చిత్రాన్ని టీవీ అసాహి, పీవీఆర్ ఐనాక్స్ పిక్చర్స్ సంయుక్తంగా విడుదల చేస్తున్నాయి. అలాగే బ్లాక్ వైట్ ఆరెంజ్ (BWO) సంస్థ అభిమానుల కోసం ప్రత్యేక ప్రచార కార్యక్రమాలను నిర్వహించనుంది. మార్కెట్ వ్యూహాల విషయంలో హ్యాపెనింగ్ 365 సినర్జీస్ సహకారం అందిస్తోంది.

టీవీ అసాహి అంతర్జాతీయ వ్యాపార విభాగం యానిమేషన్ సేల్స్ అండ్ డెవలప్‌మెంట్ హెడ్ మైకో సుమిడా మాట్లాడుతూ, “20 సంవత్సరాల తర్వాత భారతదేశంలో డోరేమాన్‌ను పెద్ద తెరపైకి తీసుకురావడం చాలా ఆనందంగా ఉంది. ఈ సినిమాలో డోరేమాన్, అతని స్నేహితులు సముద్ర గర్భంలో అద్భుతమైన సాహస యాత్ర చేస్తారు. చిన్నారులతో పాటు డోరేమాన్‌తో పెరిగిన పెద్దలు కూడా ఈ ప్రయాణాన్ని ఆస్వాదిస్తారని ఆశిస్తున్నాం” అని తెలిపారు.

అలాగే జూన్ 20, 21 తేదీల్లో ముంబైలోని జియో వరల్డ్ కన్వెన్షన్ సెంటర్‌లో జరగనున్న ‘కోర్’ పాప్ కల్చర్ ఫెస్టివల్‌లో డోరేమాన్ తొలిసారి అభిమానుల ముందుకు రానుంది. దేశవ్యాప్తంగా అభిమానులను మరింత చేరువ చేసే కార్యక్రమాలను బ్లాక్ వైట్ ఆరెంజ్ సంస్థ చేపట్టనుంది.

పీవీఆర్ ఐనాక్స్ పిక్చర్స్ సీఈవో కమల్ జియాంచందానీ మాట్లాడుతూ, “భారతీయ ప్రేక్షకుల హృదయాల్లో డోరేమాన్‌కు ప్రత్యేక స్థానం ఉంది. జపనీస్ కథలకు, యానిమే చిత్రాలకు భారత్‌లో పెరుగుతున్న ఆదరణను దృష్టిలో ఉంచుకుని ఈ చిత్రాన్ని కుటుంబ సభ్యులంతా కలిసి ఆస్వాదించేలా థియేటర్లలో విడుదల చేస్తున్నాం” అని చెప్పారు.

22వ శతాబ్దం నుంచి కాలయానం చేసి నోబితా జీవితాన్ని సులభతరం చేయడానికి వచ్చిన చెవులు లేని రోబోటిక్ పిల్లి డోరేమాన్ కథ ఇప్పటికే ప్రపంచవ్యాప్తంగా అభిమానులను సంపాదించుకుంది. 1973, 1979, 2005 సంవత్సరాల్లో టెలివిజన్ యానిమే సిరీస్‌లుగా వచ్చిన డోరేమాన్, ఇప్పుడు మరోసారి కొత్త అడ్వెంచర్‌తో భారతీయ ప్రేక్షకులను అలరించేందుకు సిద్ధమవుతోంది.