ఈ టోర్నీ ఆసాంతం స్పెయిన్, ఫ్రాన్స్ జట్లు అత్యుత్తమ ప్రదర్శన కనబరిచాయని రెండుసార్లు వరల్డ్ కప్ విజేతగా నిలిచిన రొనాల్డో పేర్కొన్నారు. సెమీ ఫైనల్లో స్పెయిన్ చేతిలో 0-2 తేడాతో ఫ్రాన్స్ ఓడిపోయి నిష్క్రమించడంతో, ఇప్పుడు లూయిస్ డి లా ఫ్యూయెంటే నేతృత్వంలోని స్పెయిన్ జట్టు వరల్డ్ కప్ ట్రోఫీని ముద్దాడే అద్భుత అవకాశాన్ని సొంతం చేసుకుందని వివరించారు. “నా దృష్టిలో మొదటి నుంచి ఫ్రాన్స్, స్పెయిన్ జట్లే ఫేవరెట్లు” అని స్పష్టం చేశారు.

అర్జెంటీనాతో పోరులో స్పెయిన్ బాల్ పజషన్ (బంతిని తమ నియంత్రణలో ఉంచుకోవడం) కీలక పాత్ర పోషిస్తుందని ఈ బ్రెజిల్ మాజీ ఆటగాడు అంచనా వేశారు. రొనాల్డో విశ్లేషణ ప్రకారం, స్పెయిన్ గనుక ఆరంభంలోనే ఆధిక్యంలోకి వెళితే, లియోనెల్ మెస్సీ జట్టు తిరిగి కోలుకోవడం చాలా కష్టం. “స్పెయిన్ ఒకటి లేదా రెండు గోల్స్ ఆధిక్యంలోకి వెళితే, మ్యాచ్‌ను తమవైపు తిప్పుకునేంత బలం అర్జెంటీనాకు ఉందని నేను అనుకోవడం లేదు. ఎందుకంటే స్పెయిన్ ఎప్పుడూ బంతిని తమ నియంత్రణలోనే ఉంచుకుంటుంది” అని ఆయన విశ్లేషించారు.

1962లో బ్రెజిల్ తర్వాత వరల్డ్ కప్ టైటిల్‌ను కాపాడుకున్న తొలి జట్టుగా నిలవాలని అర్జెంటీనా పట్టుదలగా ఉండగా, 2010లో తొలిసారి విశ్వవిజేతగా నిలిచిన స్పెయిన్.. ఇప్పుడు తమ రెండో కప్‌ను కైవసం చేసుకోవాలని చూస్తోంది.

కాగా, కెనడా అడవుల్లో చెలరేగుతున్న కార్చిచ్చు కారణంగా వెలువడుతున్న పొగ తూర్పు అమెరికాలోని పలు ప్రాంతాలను కమ్మేయడంతో.. ఫైనల్ మ్యాచ్‌పై వాతావరణ ప్రభావం పడుతుందేమోనన్న ఆందోళనలు వ్యక్తమయ్యాయి. అయితే, ఆదివారం ఉదయానికి న్యూజెర్సీలో వాతావరణం పూర్తిగా అనుకూలించి, ఆకాశం నిర్మలంగా మారడంతో అభిమానులు ఊపిరి పీల్చుకున్నారు.