అమెరికాతో కుదుర్చుకుంటున్న ఈ ఒప్పందం వల్ల ఇరాన్ జాతీయ ప్రయోజనాలకు తీవ్ర విఘాతం కలుగుతుందని హార్డ్‌లైనర్ నాయకులు వాదిస్తున్నారు. అత్యంత వ్యూహాత్మకమైన ‘స్ట్రెయిట్ ఆఫ్ హార్ముజ్’ (హార్ముజ్ జలసంధి)పై ఇరాన్‌కు ఉన్న పట్టును ఈ ఒప్పందం బలహీనపరుస్తుందని వారు ఆరోపిస్తున్నారు. వాషింగ్టన్‌తో డీల్ ఓకే చేసుకోవడం కోసం ఇరాన్ చర్చల ప్రతినిధులు అమెరికాకు మరీ ఎక్కువ లొంగిపోయారని విమర్శిస్తున్నారు.

ఒప్పందంపై ఆదివారమే సంతకాలు జరుగుతాయని ట్రంప్, పాకిస్తాన్ ప్రధాని షెహబాజ్ షరీఫ్ నొక్కిచెబుతున్నప్పటికీ.. దేశంలో వస్తున్న అంతర్గత నిరసనల నేపథ్యంలో టెహ్రాన్ అధికారిక యంత్రాంగం వెనక్కి తగ్గినట్లు కనిపిస్తోంది. ఇరాన్ విదేశాంగ మంత్రిత్వ శాఖ ప్రతినిధి ఇస్మాయిల్ బఘాయ్ స్పందిస్తూ.. “సంతకాల ప్రక్రియ రేపే (ఆదివారం) జరగదు, దానికి మరికొన్ని రోజులు పట్టవచ్చు” అని ప్రకటించారు.

రాయిటర్స్ నివేదిక ప్రకారం.. ఈ ప్రతిపాదిత అవగాహన ఒప్పందం (MoU) ప్రధానంగా హార్ముజ్ జలసంధిని తిరిగి తెరవడం, ఇరాన్‌పై అమెరికా నౌకాదళ ముట్టడిని ఎత్తివేయడంపైనే కేంద్రీకృతమైంది. దీనికి బదులుగా, అంతర్జాతీయంగా స్తంభింపజేసిన ఇరాన్‌కు చెందిన బిలియన్ల కొద్దీ డాలర్ల నిధులను విడుదల చేయడానికి మరియు ఇరాన్ చమురు ఎగుమతులపై ఆంక్షల సడలింపుకు అమెరికా అంగీకరించినట్లు ముసాయిదా పత్రాలు చెబుతున్నాయి. కాగా, అత్యంత వివాదాస్పదమైన ఇరాన్ అణు కార్యక్రమంపై చర్చలను తదుపరి 60 రోజుల ప్రత్యేక ప్రక్రియలో చేపట్టాలని నిర్ణయించారు. అయితే సొంత దేశంలోనే తీవ్ర వ్యతిరేకత వ్యక్తమవుతుండటంతో ఇరాన్ ప్రభుత్వం ఈ ఒప్పందంపై ముందడుగు వేస్తుందా లేదా అనేది ఇప్పుడు ఉత్కంఠగా మారింది.