టీజర్ ప్రారంభం నుంచే వారాహి అమ్మవారి శాపం చుట్టూ తిరిగే కథను పరిచయం చేస్తుంది. ఒక వంశంలో పుట్టిన పురుషులు 33 ఏళ్లు దాటకుండా మరణిస్తారనే శాపం, ఆ తర్వాత మహేంద్రగిరిలో చోటుచేసుకునే అనుమానాస్పద మరణాలు కథపై ఉత్కంఠను పెంచుతున్నాయి. ఈ రహస్యాన్ని ఛేదించే పాత్రలో సుమంత్ కనిపిస్తుండటం ప్రత్యేక ఆకర్షణగా మారింది. ఆయన పాత్రలోని సీరియస్‌నెస్, ఇన్వెస్టిగేషన్ ఎలిమెంట్స్ సినిమాపై అంచనాలను పెంచుతున్నాయి.

ఈ చిత్రంలో ఐశ్వర్య రాజేష్, మాళవిక నాయర్ కీలక పాత్రల్లో నటిస్తున్నారు. బ్రహ్మానందం, వెన్నెల కిషోర్, రాజీవ్ కనకాల, సత్యసాయి శ్రీనివాస్ తదితరులు ప్రధాన పాత్రల్లో కనిపించనున్నారు. రాజశ్యామల ఎంటర్‌టైన్‌మెంట్స్, బ్రిడ్జ్ ఫిల్మ్స్ బ్యానర్లపై మధు కలిపు, లక్ష్మణ్ ఈ చిత్రాన్ని నిర్మిస్తున్నారు. అనూప్ రూబెన్స్ సంగీతం అందిస్తుండగా, మురళి కథను అందించారు.

టీజర్ విడుదల కార్యక్రమానికి ముఖ్య అతిథిగా హాజరైన దర్శకుడు అనిల్ రావిపూడి, టీజర్‌పై ప్రశంసలు కురిపించారు. థ్రిల్లింగ్ ఎలిమెంట్స్‌తో పాటు అనూప్ రూబెన్స్ అందించిన బ్యాక్‌గ్రౌండ్ స్కోర్ సినిమాకు ప్రత్యేక బలం అవుతుందని ఆయన పేర్కొన్నారు. దర్శకుడు సంతోష్ జాగర్లపూడి విజన్ కూడా టీజర్‌లో స్పష్టంగా కనిపిస్తోందని అన్నారు. సుమంత్ కెరీర్‌లో ఇది మరో గుర్తుండిపోయే చిత్రంగా నిలుస్తుందని ఆశాభావం వ్యక్తం చేశారు.

ఇప్పటికే ‘అనగనగా’తో మంచి గుర్తింపు తెచ్చుకున్న సుమంత్, ఇప్పుడు ‘మహేంద్రగిరి వారాహి’తో మరోసారి ప్రేక్షకులను మెప్పించేందుకు సిద్ధమవుతున్నారు. టీజర్ చూస్తుంటే మిస్టరీ, ఆధ్యాత్మికత, ఫాంటసీ అంశాలతో కూడిన ఈ చిత్రం ప్రేక్షకులకు భిన్నమైన అనుభూతిని అందించే అవకాశం కనిపిస్తోంది. విడుదల తేదీపై అధికారిక ప్రకటన రావాల్సి ఉన్నప్పటికీ, టీజర్‌తోనే ఈ సినిమాపై సినీ అభిమానుల్లో ఆసక్తి నెలకొంది.