ఆనాటి సైనిక చర్యను గుర్తుచేస్తూ.. “పదేళ్ల క్రితం, సరిగ్గా 2016 సెప్టెంబరు 28-29 తేదీల్లో భారత సైన్యం పాకిస్థాన్‌లోని ఉగ్రవాద స్థావరాలపై సర్జికల్ దాడులు నిర్వహించింది. మన భారత జవాన్లు నియంత్రణ రేఖ (LoC) దాటి వెళ్లి ఉగ్రవాదంపై విరుచుకుపడిన తీరును చూసి ప్రపంచమంతా విస్మయానికి గురైంది. భారతదేశ ఉగ్రవాద వ్యతిరేక విధానానికి సంబంధించి ఈ సర్జికల్ దాడి యావత్ ప్రపంచానికి సరికొత్త మార్గాన్ని ధైర్యంగా చూపించింది” అని ప్రధాని కొనియాడారు. దీర్ఘకాలంగా ఉగ్రదాడుల వల్ల భారత్ అనుభవించిన వేదనకు ఇది నిర్ణయాత్మక సమాధానంగా నిలిచిందన్నారు. 2016 సెప్టెంబరు 18న ఉరీలోని ఆర్మీ క్యాంప్‌పై జరిగిన ఉగ్రదాడికి ప్రతీకారంగా నియంత్రణ రేఖ వెంబడి ఉన్న లాంచ్‌ప్యాడ్‌లను లక్ష్యంగా చేసుకుని ఈ దాడులు జరిగాయి.

గతంలో ఉగ్రదాడులు జరిగిన ప్రతిసారీ పాకిస్థాన్‌పై కఠిన చర్యలు తీసుకోవాలనే డిమాండ్లు వచ్చినప్పటికీ, వాటిపై తగిన శ్రద్ధ చూపే పరిస్థితి లేదని ప్రధాని విమర్శించారు. సమయం గడిచేవరకు వేచిచూసే ధోరణి ఆనాడు ఉండేదని, కానీ నేటి భారతదేశం ఆ విధానాన్ని పూర్తిగా మార్చేసిందని తెలిపారు. ఇప్పటి భారత్ ఉగ్రవాదాన్ని ఏమాత్రం ఉపేక్షించని బలమైన విధానంతో ముందుకు సాగుతోందని పేర్కొన్నారు.