మోదీ గుజరాత్ ముఖ్యమంత్రిగా బాధ్యతలు చేపట్టినప్పుడు ఆ రాష్ట్రం అదే ఏడాది సంభవించిన వినాశకరమైన కచ్ భూకంపం ప్రభావం నుండి కోలుకుంటోంది. పునర్నిర్మాణం, నీటి నిర్వహణ, సాగునీటి పారుదల, మౌలిక సదుపాయాల కల్పనపై ఆయన ప్రభుత్వం ప్రధానంగా దృష్టి సారించింది. చెక్ డ్యామ్‌లు , నర్మదా కాలువ వ్యవస్థ విస్తరణ రాష్ట్రంలో వ్యవసాయ, పారిశ్రామిక అభివృద్ధికి ఊతమిచ్చాయి.2002 గుజరాత్ అసెంబ్లీ ఎన్నికల్లో బీజేపీ విజయం సాధించిన తర్వాత మోదీ 12 ఏళ్లకు పైగా ముఖ్యమంత్రిగా బాధ్యతలు నిర్వర్తించారు. ఈ కాలంలో ఆయన హయాం ‘గుజరాత్ మోడల్’తో గుర్తింపు పొందింది. ఈ విధానం మౌలిక సదుపాయాలు, పెట్టుబడులు, నీటిపారుదల, వేగవంతమైన నిర్ణయ ప్రక్రియలకు ప్రాధాన్యతనిచ్చింది.

2013లో నరేంద్ర మోదీని బీజేపీ ప్రధానమంత్రి అభ్యర్థిగా ప్రకటించారు. ఒక సంవత్సరం తర్వాత జరిగిన 2014 లోక్‌సభ ఎన్నికల్లో బీజేపీ 282 స్థానాలను గెలుచుకుంది. దాంతో మోదీ గుజరాత్ నుండి ఢిల్లీకి మారారు. దీనితో ఆయన ప్రస్థానం రాష్ట్ర స్థాయి పాలన నుండి జాతీయ రాజకీయాల వైపు మళ్లింది. ఆ తర్వాత ఆర్థిక వ్యవస్థ, సామాజిక రంగం , విదేశాంగ విధానం వంటి అంశాలలో కేంద్ర ప్రభుత్వం అనేక కీలకమైన కార్యక్రమాలను చేపట్టింది.

2017లో జీఎస్టీని అమలు చేయడంతో, చాలా పరోక్ష పన్నులు ఒకే జాతీయ చట్రం కిందకు వచ్చాయి. కార్పొరేట్ దివాలాను పరిష్కరించడానికి దివాలా , బ్యాంక్రప్టసీ కోడ్ ఒక యంత్రాంగాన్ని ఏర్పాటు చేసింది. బ్యాంకింగ్ రంగంలో మొండి బకాయిలను గుర్తించి, పునర్‌వ్యవస్థీకరించడానికి కూడా చర్యలు తీసుకున్నారు. అధిక విలువ గల కరెన్సీ నోట్లను ఉపసంహరించుకున్న 2016 పెద్ద నోట్ల రద్దు, మోదీ ప్రభుత్వ మొదటి పదవీకాలంలోని అత్యంత వివాదాస్పద ఆర్థిక నిర్ణయాలలో ఒకటిగా నిలిచింది.

మోదీ ప్రభుత్వ అజెండాలో మౌలిక సదుపాయాలు, అనుసంధానత (connectivity) కీలక ప్రాధాన్యతలుగా ఉన్నాయి. ఈశాన్య రాష్ట్రాలు జమ్మూ & కాశ్మీర్‌లకు అనుసంధానతను మెరుగుపరచడంపై ప్రత్యేక దృష్టి సారించారు. అదే సమయంలో డిజిటల్ ప్రజా మౌలిక సదుపాయాలు , డిజిటల్ చెల్లింపుల విస్తరణ ఒక గొప్ప విజయంగా పరిగణించబడుతోంది. మోదీ ప్రభుత్వ హయాంలో భద్రతా రంగంలో కూడా కీలక నిర్ణయాలు తీసుకున్నారు.2016 నాటి ఉరీ దాడి తర్వాత భారత్ సరిహద్దు ఆవల ‘సర్జికల్ స్ట్రైక్’ నిర్వహించింది. 2019 నాటి పుల్వామా దాడి అనంతరం బాలాకోట్ వైమానిక దాడి జరిగింది. 2025లో పహల్గామ్ ఉగ్రవాద దాడి తర్వాత ప్రభుత్వం ‘ఆపరేషన్ సింధూర్’ను ప్రకటించింది. సరిహద్దు ఆవల నుంచి సాగే ఉగ్రవాదానికి వ్యతిరేకంగా భారత్ చేపట్టిన మరింత ప్రత్యక్ష చర్యగా దీనిని పరిగణించారు.

విదేశాంగ విధానంలో వ్యూహాత్మక భాగస్వామ్యాలు, ఇంధన భద్రత, భారతీయ ప్రవాసులతో సంబంధాలతో పాటు వ్యూహాత్మక స్వయంప్రతిపత్తికి ప్రాధాన్యత కొనసాగింది. కోవిడ్-19 మహమ్మారి కూడా మోదీ ప్రభుత్వానికి ఒక పెద్ద సవాలుగా నిలిచింది. 2021లో దేశంలో జాతీయ టీకా కార్యక్రమాన్ని ప్రారంభించగా దానిలో భాగంగా 2 బిలియన్లకు పైగా డోసులను వేశారు. ఈ విధంగా గుజరాత్ ముఖ్యమంత్రిగా ఆయన పదవీకాలం నుండి దేశ ప్రధానమంత్రి అయ్యే వరకు సాగిన నరేంద్ర మోదీ 25 ఏళ్ల ప్రజా జీవిత ప్రయాణం ఎన్నో ముఖ్యమైన నిర్ణయాలు, కీలక సంఘటనలతో నిండి ఉంది.