మొదట కుటుంబ సభ్యులతో కలిసి సంప్రదాయ పద్ధతిలో మొక్కజొన్న, జొన్న, కూరగాయలు, కందులు సాగు చేశారు. కానీ రసాయన ఎరువుల ఖర్చులు పెరగడం, మార్కెట్ ధరల్లో తీవ్ర హెచ్చుతగ్గులు ఉండటంతో లాభాలు తగ్గిపోయాయి. దీంతో కొత్త మార్గాల కోసం అన్వేషించిన జైపాల్, భారత మార్కెట్‌లో ఇంకా విస్తృతంగా సాగు చేయని అవకాడో పంటపై దృష్టి పెట్టారు. 2013లో ఇజ్రాయెల్ నుంచి హాస్ రకం అవకాడో మొక్కలను దిగుమతి చేసుకుని సాగు ప్రారంభించినా, తెలంగాణ వాతావరణానికి అవి అనుకూలించకపోవడంతో మొత్తం పెట్టుబడి నష్టపోయారు.

ఆ నష్టంతో కొంతకాలం సివిల్ కాంట్రాక్టింగ్ రంగంలో పనిచేసిన జైపాల్, కరోనా సమయంలో మళ్లీ వ్యవసాయం వైపు మళ్లారు. ఈసారి తెలంగాణ వాతావరణాన్ని తట్టుకునే వెస్ట్ ఇండియన్ అవకాడో రకాన్ని ఎంపిక చేసి 2020లో 430 మొక్కలను నాటారు. ప్రారంభంలో ఒక్కో చెట్టు నుంచి 5 నుంచి 10 కిలోల వరకు దిగుబడి వచ్చినా, ప్రస్తుతం ఆ మొక్కలు ఆరవ ఏడాదిలోకి రావడంతో ఒక్కో చెట్టు నుంచి సుమారు 20 కిలోల వరకు పండ్లు వస్తున్నాయి. ప్రస్తుతం 1.2 ఎకరాల్లో 250 ఫలాలిచ్చే చెట్లతో ఏటా సుమారు రూ.8 లక్షల ఆదాయం పొందుతున్నారు.

జైపాల్ విజయానికి మరో ప్రధాన కారణం సేంద్రియ సాగు. రసాయన ఎరువులు, పురుగుమందులకు పూర్తిగా దూరంగా ఉంటూ, ఆవు పేడ, ఆవు మూత్రం, వేపపిండి, సేంద్రియ ఎరువులతోనే పంటను సాగు చేస్తున్నారు. దీంతో పండ్లకు మంచి నాణ్యత రావడంతో మార్కెట్లో అధిక ధర లభిస్తోందని ఆయన చెబుతున్నారు. మధ్యవర్తులపై ఆధారపడకుండా వాట్సాప్, సోషల్ మీడియా ద్వారా నేరుగా వినియోగదారులకు విక్రయించడం కూడా ఆయన ఆదాయాన్ని పెంచింది. అంతేకాకుండా అవకాడో మొక్కలను విక్రయించే నర్సరీని కూడా ఏర్పాటు చేసి, ఏడాదికి 5 వేల నుంచి 10 వేల మొక్కలు అమ్ముతూ మరో రూ.5 లక్షల వరకు ఆదాయం పొందుతున్నారు.

వ్యవసాయంలో విజయం సాధించాలంటే కేవలం కొత్త పంటను ఎంచుకోవడం మాత్రమే కాదు, మార్కెట్ డిమాండ్‌ను అర్థం చేసుకోవడం, స్థానిక వాతావరణానికి సరిపోయే రకాలను ఎంపిక చేయడం, ఖర్చులను నియంత్రించడం ఎంతో ముఖ్యమని జైపాల్ నాయక్ చెబుతున్నారు. ప్రారంభంలో సవాళ్లు, నష్టాలు ఎదురైనా సరైన ప్రణాళికతో ముందుకెళ్తే వ్యవసాయం కూడా కార్పొరేట్ ఉద్యోగానికి ఏమాత్రం తీసిపోని ఆదాయాన్ని అందిస్తుందని ఆయన నిరూపించి ఎంతోమందికి స్ఫూర్తిగా నిలిచారు.