ఫిఫా వరల్డ్ కప్ 2026ను భారత్‌లో ప్రసారం చేసే హక్కులను జీ ఎంటర్‌టైన్‌మెంట్ సొంతం చేసుకుంది. దీంతో దేశవ్యాప్తంగా ఫుట్‌బాల్ అభిమానులు టెలివిజన్‌తో పాటు డిజిటల్ వేదికల ద్వారా కూడా మ్యాచ్‌లను వీక్షించే అవకాశం పొందనున్నారు. టోర్నమెంట్ ప్రసార భాగస్వామిపై నెలల తరబడి కొనసాగిన అనిశ్చితికి ఈ నిర్ణయంతో ముగింపు లభించింది.

ఈ ఒప్పందం కేవలం వరల్డ్ కప్‌కే పరిమితం కాకుండా ఫిఫాతో జీ సంస్థ కుదుర్చుకున్న దీర్ఘకాల భాగస్వామ్యంలో భాగంగా ఉంది. ఈ ఒప్పందం ప్రకారం 2034 వరకు నిర్వహించనున్న మరో 38 ఫిఫా టోర్నమెంట్‌ల ప్రసార హక్కులను కూడా జీ సంస్థ పొందినట్లు సమాచారం. దీంతో అంతర్జాతీయ ఫుట్‌బాల్ ప్రసారాల్లో జీ తన స్థాయిని మరింత బలోపేతం చేసుకుంది.

తమ క్రీడా ప్రసార విభాగాన్ని విస్తరించే క్రమంలో జీ సంస్థ కొత్తగా నాలుగు ప్రత్యేక స్పోర్ట్స్ ఛానళ్లను ప్రారంభించింది. యునైట్8 స్పోర్ట్స్ 1, యునైట్8 స్పోర్ట్స్ 1 హెచ్‌డీ, యునైట్8 స్పోర్ట్స్ 2, యునైట్8 స్పోర్ట్స్ 2 హెచ్‌డీ ఛానళ్ల ద్వారా వరల్డ్ కప్ మ్యాచ్‌లను ప్రత్యక్ష ప్రసారం చేయనుంది. టెలివిజన్ ప్రేక్షకులతో పాటు డిజిటల్ వీక్షకులను దృష్టిలో ఉంచుకుని జీ5 ఓటీటీ వేదికలో కూడా అన్ని ప్రధాన మ్యాచ్‌లను అందుబాటులో ఉంచుతోంది.

స్ట్రీమింగ్ సేవలను వినియోగించాలనుకునే వారికి జీ5 రెండు సబ్‌స్క్రిప్షన్ ప్యాకేజీలను అందిస్తోంది. మూడు నెలల ప్లాన్ ధర రూ.799 కాగా, వార్షిక ప్లాన్ రూ.1,699గా నిర్ణయించింది. దీంతో మొబైల్, టాబ్లెట్, స్మార్ట్ టీవీ వంటి పరికరాల ద్వారా కూడా అభిమానులు మ్యాచ్‌లను వీక్షించవచ్చు.

అయితే చెల్లింపు సేవలు అందుబాటులో లేని ప్రేక్షకులకు కూడా వరల్డ్ కప్ ఉత్కంఠను ఆస్వాదించే అవకాశం ఉంది. ప్రభుత్వ ప్రసార సంస్థ డీడీ స్పోర్ట్స్ టోర్నమెంట్‌లోని కొన్ని కీలక మ్యాచ్‌లను ఉచితంగా ప్రసారం చేయనున్నట్లు ప్రకటించింది. ప్రారంభ మ్యాచ్‌తో పాటు నాకౌట్ దశలోని ముఖ్య పోటీలను కూడా డీడీ స్పోర్ట్స్‌లో వీక్షించవచ్చు.

టోర్నమెంట్ ప్రారంభ పోరుగా మెక్సికో-దక్షిణాఫ్రికా జట్ల మధ్య జరిగే మ్యాచ్‌ను డీడీ స్పోర్ట్స్ ప్రసారం చేయనుంది. భారత కాలమానం ప్రకారం జూన్ 12 అర్ధరాత్రి 12:30 గంటలకు ఈ మ్యాచ్ టెలికాస్ట్ కానుంది. అలాగే జూలై 9, 10, 11 తేదీల్లో జరిగే క్వార్టర్ ఫైనల్స్, జూలై 14, 15 తేదీల్లో జరిగే రెండు సెమీఫైనల్స్‌ను కూడా డీడీ ఫ్రీ డిష్ వినియోగదారులు ఉచితంగా వీక్షించగలరు.

ఇక టోర్నమెంట్‌లో అత్యంత కీలకమైన ఫైనల్ మ్యాచ్‌ను కూడా డీడీ స్పోర్ట్స్ ప్రత్యక్ష ప్రసారం చేయనుంది. జూలై 19న జరగనున్న ఫైనల్ పోరును దేశవ్యాప్తంగా కోట్లాది మంది అభిమానులు ఉచితంగా వీక్షించే అవకాశం పొందనున్నారు.