పోలీసుల విచారణలో నిందితుడిని 19 ఏళ్ల షాదాబ్ గా గుర్తించారు. నిందితుడు ప్రముఖ ఆన్‌లైన్ సంస్థ జెప్టోలో డెలివరీ ఎగ్జిక్యూటివ్ గా పనిచేస్తున్నాడు. వృత్తిని పక్కనపెట్టి నగరంలోని అత్యంత రద్దీ ప్రాంతాలైన కేబీఆర్ పార్క్ మెయిన్ రోడ్డులో అత్యంత ప్రమాదకరమైన రీతిలో స్టంట్స్ చేశాడు. అలాగే నగర శివార్లలోని శామీర్‌పేట రోడ్లపై కూడా తోటి వాహనదారులకు తీవ్ర భయాందోళనలు గురిచేస్తూ పిచ్చి స్టంట్స్ తో రెచ్చిపోయాడు.

దర్యాప్తులో భాగంగా ఈ ప్రమాదకరమైన స్టంట్స్ కోసం ఉపయోగించిన మోటార్ సైకిల్‌ను పోలీసులు వెంటనే సీజ్ చేశారు. ట్రాఫిక్ నిబంధనలను ఉల్లంఘిస్తూ, పాదచారులకు ప్రాణహాని కలిగించేలా వ్యవహరిస్తే ఎవరినీ ఉపేక్షించేది లేదని హెచ్చరించారు. పబ్లిక్ రోడ్లను రేసింగ్ ట్రాక్‌లుగా మార్చుకుని సామాన్యులను భయబ్రాంతులకు గురిచేస్తే చట్టపరమైన కఠిన చర్యలు తప్పవని ఉన్నతాధికారులు స్పష్టం చేశారు.

కేవలం సోషల్ మీడియాలో క్రేజ్ సంపాదించాలనే ఆలోచనతో ఇలాంటి ప్రమాదకరమైన వీడియోలు షేర్ చేసే యువతపై ప్రత్యేక నిఘా పెట్టామని పోలీస్ అధికారులు తేల్చి చెప్పారు. పబ్లిక్ లో భయాందోళనలు సృష్టించే ఇలాంటి పిచ్చి చేష్టలకు పాల్పడే యువకులను ఎట్టి పరిస్థితుల్లోనూ వదిలిపెట్టబోమని, ఇకముందు కూడా డ్రైవింగ్ లైసెన్సులు రద్దు చేసి కఠినంగా శిక్షిస్తామని పోలీసులు పునరుద్ఘాటించారు.